LAOAG CITY – Nakapatpateg ti ibibisita ni Presidente Ferdinand Marcos Jr. iti Estados Unidos no sadinno nga iti panagtaripnong da ken ni President Donald Trump ket inpaganetget na manen ti dakkel a maitultulong iti Amerika iti panangpapigsa ti depensa ti Pilipinas, kangrunaan na ti mapaspasamak a geo-political development kadagiti napalpalabas a dekada ket saan nga stable ti seguridad iti West Philippine Sea.
Daytoy ti inbatad ni Prof. Karl Lenin Benigno, ti Vice President for Academic Affairs iti Northwestern University ken Political Analyst.
Kuna na pay a ti maysa a kapatgan iti ibibisita ni Presidente Marcos idiay Estados Unidos ket ti panagkiddaw na ti tulong para iti pannakaestablisar ti ammunition hub ditoy pagilian partikular iti Subic.
Inlawlawag na a ti maysa kadagiti kapatgan a programa ti Armed Forces of the Philippines a mangsuporta iti self-alliance program ket ti pannakaestablisar ti bukod a pagaramidan ti bala.
Inpalgak na a no bilang adda ti mapasamak a gubat ken kasapulan dagiti kameng ti armada ti ado a bala ket saanen a kasapulan ti mapan gumatang iti sabali a pagilian gapu ta addan ti bukod a pagaramidan ken alisto a pagalaan.
Nupay kasta, kuna ni Benigno a masapol nga agannad ken panunuten a naimbag daytoy ti gobierno gapu ta no maestablisar ti ammunition hub ditoy pagilian ket sigurado nga adda ti dagus a reaksyon ti gobierno ti China.
