LAOAG CITY – Imbestigaran ti Kamara babaen kadagiti maseknan nga ahensia ti gobierno ti nagbalin a papel da dati a Presidente Rodrigo Duterte, Vice President Sara Duterte ken Sen. Ronald “Bato” dela Rosa iti panaglemmeng ni Kingdom of Jesus Christ (KOJC) founder Pastor Apollo Quiboloy.
Segun ken ni Manila Rep. Joel Chua, ti dati a Presidente a tumaktakder nga Administrador ti Kingdom of Jesus Christ compound no sadinno a natiliw ni Quiboloy.
Inbatad ni Chua nga adda ti rakurak ni Vice Pres. Sara nga awanen iti Kingdom of Jesus Christ compound idiay Davao City ni Quiboloy a maipagarup a posible a nairanta ti panangibagana tapno maallilaw dagiti otoridad.
Inpetteng ni Chua a nasken a makikoordinar ti amin tapno maarestar dagiti wanted iti linteg.
Naammoan a ni Quiboloy ket sumangsango iti kaso a child abuse, sexual abuse ken qualified trafficking malaksid pay kadagiti sangsangoenna idiay Estados Unidos.
Kabayatanna, insingasing ni House Assistant Majority Leader Jil Bongalon a nasken a maimbestigaran wenno kasoan ni Senador Ronald “Bato” dela Rosa ti obstruction of justice gapu iti panag-divert iti atension dagiti pulis iti panangipila ti warrant of arrest kontra ken ni Quiboloy.
