LAOAG CITY – Inbatad ni National Bureau of Investigation (NBI) Regional Director Atty. Jeremy Lotoc a saan a mabalin a balewalaen ti komisyon ti maipagarop a pangta ni Vice President Sara Duterte kontra kada Presidente Ferdinand Marcos Jr., First Lady Liza Araneta-Marcos, ken dati nga House Speaker Martin Romualdez gapu iti posisyon na ken iti background ti pamilya na.
Segun ken ni Lotoc, karaman kadagiti rason no apay nga inpadalan ti NBI iti imbestigasyon ti rakurak ti Bise Presidente idi Nobyembre 2024 online press conference ket gapu ta adda ti kabaelan a mangipatungpal ti maipagarop a nasao a pangta.
Iti maikalima nga aldaw ti impeachment trial, sinaludsud ni Senate President Sherwin Gatchalian ni Lotoc no ania ti nagibasaran ti NBI Cybercrime Division tapno mamati nga adda ti in-hire a tao ni VP Sara a mabalin a mangpatay iti presidente, firsy lady ken dati nga House Speaker.
Inlawlawag ni Lotoc, nga uray naglikudan ti Bise presidente ti alegasyon a grave threats, mamati ti NBI a nakita da dagiti elemento ti nasao a krimen gapu kadagiti nagbalin a rakurak na ken dagiti tattao a maipagarop a nakasarita na.
