LAOAG CITY – Nagballaag ni Presidente Ferdinand Marcos Jr. iti publiko aglalo kadagiti kabaelan na ti gumatang ti ado, a liklikan ti panag-hoard ti diesel iti baet ti agdama a sitwasyon iti suplay ti langis.
Segun iti presidente, dagiti laeng consumer nga addaan ti lehitimo a pagkasapulan ti mapalubusan nga agpenpen ti gasolina.
Karaman ditoy dagiti mangngalap, marine equipment operators, dagiti ospital, ken dadduma pay nga agusar ti generator set para iti operasyon da.
Kinondenar ti presidente dagiti insidente ti fuel theft ken dadduma pay nga iregularidad nga adda ti pakainaigan ti langis.
Inpetteng ni Marcos a nakaladladingit ken makapadismaya dagiti report nga adda ti sumagmamano nga indibidual a nanggungundaway ti sitwasyon para iti bukod da a pagsayaatan.
Kabayatanna, nagpanawagan ni Presidente Marcos a saan koma a maggundaway iti pada a tao gapu ta saan a kastoy ti kababalin dagiti Pilipino.
