LAOAG CITY – Nakasaganan ti Philippine Coast Guard (PCG) iti panagbantay para iti natalged ken naurnos a Traslacion 2026 a maisayangkat idiay Manila inton Biernes, Enero 9.
Inbatad ni Coast Guard Station (CGS) Malacañang Commander, Commander Michael John Encina, malaksid kadagiti tauhan ket mangi-deploy met ti Philippine Coast Guard kadagiti patrol boat ken dadduma pay floating asset.
Daytoy ket tapno maipasigurado ti kasasaad ti minilyon a deboto a manamnama a makipaset iti nasao nga aktibidad.
Inlawlawagna a naiget ti maisaysayangkat a pannakikoordinar ti Coast Guard Station Malacañang iti Armed Forces of the Philippines (AFP), Philippine National Police (PNP) ken lokal a gobierno ti Manila tapno masigurado ti naannayas a pannakaisayangkat ti Traslacion 2026.
Nagpanawagan pay ti Philippine Coast Guard iti publiko nga agtalinaed nga alerto ken makibinnulig kadagiti otoridad para iti kinatalged ken seguridad ti amin iti mismo nga aldaw iti fiesta ti Jesus Nazareno.
