LAOAG CITY – Saanen a kasapulan ti travel authority manipud iti opisina ti Senate President no ti foreign travel ti maysa a Senador ket personal.
Daytoy ti sungbat ni Senate President Sherwin Gatchalian kalpasan a nasaludsod maipanggep iti panagtalaw ti agina nga isuda Senador Loren Legarda ken Batangas Rep. Leandro Leviste ti pagilian iti nagsina a flights.
Inbatad ni Gatchalian a no personal ti biahe ket saanen a masapul a mangala ti travel authority manipud iti Senado.
Nupay kasta, kuna ni Gatchalian nga awan ti impormasionna maipanggep iti biahe ni Legarda ken saanda nga agsinsinnarita ti Senadora mainaig kadagiti biahe daytoy iti abroad.
Kabayatanna, kinumpirmaran ni Senate Secretary Renato Bantug Jr., nga idi Agosto 3 ket nangipatulod ti surat ti chief of staff ni Legarda tapno ipakaammo iti Office of the Secretary a naka-medical leave ti Senadora manipud Agosto 3 agingga 5.
Maipalagip a manipud Lunes agingga Mierkoles ket saan a nagatendar ni Legarda iti impeachment trial pakairamanan ti regular session iti Senado.
