LAOAG CITY – Inbatad ni Governor Matthew Marcos Manotoc ti optimismo para iti namnama ti ekonomia ditoy probinsia kalpasan ti investment conference kadagiti negosiante a Thai.
Kinunana a ti delegasion ti negosio, nga idauluan ni Thailand Ambassador iti Pilipinas a ni Tull Traisorat, dinakamatna ti bid ti lokal a gobierno para iti kinalaka ti panagnegosio kas plus factor para kadagiti future investments.
Panggep ti delegasion ti Thailand ti mangikabil iti pondo kadagiti kangrunaan a sektor kas iti taraon ken agrikultura, turismo, information and technology, business process management, ken renewable energy.
Inayonna a mabalin a direkta a mapan dagiti investors iti I-Care Desk ti kapitolio probinsial para kadagiti pakaseknanda gapu ta daytoy ti centralized application and requirement evaluation desk a tumultulong iti investor registration ken permit ken licensing acquisition tapnu alalisto ti pannakaproseso dagiti kasapulan a dokumento.
Namnammaen ti gobernador a makaawis dagiti big-time investors ditoy probinsia, partikular iti naisingasing a panagpataray ti dakkel a casino iti Fort Ilocandia Resort ken ti pannakapadur-as ti golf course ti Paoay.
Kabayatanna, aktibo nga itantandudo ditoy probinsia ti public-private partnerships nga addaan iti flexible terms.
