LAOAG CITY – Nangisayangkat ti Provincial Government of Ilocos Norte (PGIN) iti pannakitinnulong ti Department of Health (DOH) iti groundbreaking ceremony para iti pannakaipasdek ti uppat a kadsaaran nga annex building ti Bangui District Hospital iti ili ti Bangui.
Ti 25-bed secondary hospital ket imatmatonan ti gobierno probinsial no sadinno nga agserserbi daytoy kas kangrunaan nga healthcare provider iti amianan a paset ti Ilocos Norte.
Nailatang ti pundo nga agdagup ti P74 million manipud iti General Appropriations Act of 2023-2024 babaen iti Department of Health hospital enhancement project tapno ma-upgrade ti ospital manipud Level 1 agingga iti Level 2.
Mainaig iti daytoy, agtultuloy ti panagdur-as ti gobierno probinsial babaen iti panangidaulo ni Gob. Matthew Marcos Manotoc kadagiti proyekto a panggepna a papigsaen ti sistema ti panangtaripato iti salun-at ti probinsia tapno maipaay serbisio medikal kadagiti umili.
Inbatadna a maysa a milestone iti pannakagun-od ti Level 2 status para iti Bangui District Hospital tapno daytoy ket agbalin kas premiere hospital iti amianan a lugar ti probinsia.
Binigbigna pay ti panagregget dagiti empleado ti ospital tapno agtultuloy a mangipaay iti de kalidad a serbisio.
Kuna met ni Dr. Rogelio Balbag, Executive Director ti Hospital Management Council ti Ilocos Norte nga agkaykaysa ti komunidad ken staff tapno matungpal ti sirmata ti gobierno probinsial iti pannakapasayaat ti healthcare delivery system ti probinsia babaen iti pannakapasayaat ti Bangui District Hospital.
Kabayatanna ti uppat a kadsaaran nga annex building ket pakairamanan ti baro nga Intensive Care Unit (ICU), pediatric ICU, operating room para kadagiti kaso ti ob-gyne ken operasion, modern emergency room, well equiped pharmacy, advance laboratory ken radiology Department nga addaan iti CT-scan unit.
