LAOAG CITY – Manarimaan ti negosasion ti Provincial Government of Ilocos Norte ken Mariano Marcos Memorial Hospital and Medical Center iti siudad ti Batac maipanggep iti ad-adda pay a pannakapapintas ti Pancian District Hospital.
Segun ken ni Dr. Rogelio Balbag, Executive Director ti Hospital Management Council ti gobierno probinsial ti Ilocos Norte, kalikagumna a maaddaan ti regular a doktor nga agserbi iti nasao nga ospital tapno adda latta ti nakasagana a mangtaming kadagiti maitaray a pasiente.
Kabayatanna, inlawlawag ni Dr. Balbag nga adda ti uppat a nurse a naka-duty iti nasao nga ospital ken adda ti naka-duty a security guard ngem manarimaan ti panag-roving daytoy iti likod ti ospital.
Inbatadna a daytoy ti naammoanna iti imbestigasion maipanggep iti maipagarup a pannakatay ti maysa a pasiente kalpasan nga awan ti nasangpetanda a tao iti Barangay Pancian Pagudpud Extension Hospital.
Gapu iti daytoy, kuna ti Executive Director ti Hospital Management Council ti gobierno probinsial ti Ilocos Norte ket saan a mabalin a panawan ti sango ti ospital nga awan ti tao tapno alisto a maakomodar dagiti pasiente.
