LAOAG CITY – Inpalawa ti Philippine Health Insurance Corp. (PhilHealth) ti uppat a package benefits kadagiti miembro nga addaan ti ischemic heart disease-acute myocardial infarction.
Inbatad ni Dr. Israel Francis Pargas, pannakangiwat ken Senior Vice President ti PhilHealth, ti dati a benepisio a P30,000 para kadagiti agkasapulan ti angioplasty ket naipangaton iti P500,000.
Malaksid iti daytoy, iti cardiac rehabilitation a dumanon iti P60,000 ken fibrinolysis a sumurok iti P100,000.
Karaman pay iti kanayonan a benepisio ti magastos iti panagusar ti ambulance transfer para kadagiti agkasapulan ti pannakaiyakar manipud iti ospital nga awan ti umdas a kabaelanna tapno tamingen ti pasiente.
Naammoan a naikkat payen ti dati a pagalagadan a “single period of confinement” no sadinno a limitado laeng ti benepisio no maminsan manen a ma-confine ti pasiente iti kapada a rason.
