LAOAG CITY – Inpasigurado ti Philippine Health Insurance Corporation (PhilHealth) kadagiti Pilipino iti awan sarday nga access dagiti benepisyo para iti salun-at iti baet ti desisyon ti Bicameral Conference Committee a lapdan ti subsidy para iti 2025.
Inpetteng ti Presidente ken Chief Executive Officer ti Philhealth a ni Emmanuel R. Ledesma Jr. a ti natalged a pondo ti ahensya a mangipaspasigurado kadagiti benepisyo ket agtalinaed a saan nga apektado.
Kuna na pay nga ipaspasigurado da iti publiko nga awan dagiti benepisyo a makissayan wenno maikkat gapu ta adda ti umdas a pondo ti Philhealth para iti daytoy.
Mainaig iti daytoy, plano pay ti health insurer nga itultuloy ti pannakapasayaat dagiti health package iti 2025, karaman dagiti operasyon iti puso, operasyon ti katarata, ken dagiti optometric services.
Inpatalged ni Ledesma kadagiti miembro, karaman dagiti indigent ken senior citizen a natalged dagiti benepisyo aniaman ti subsidy ti gobyerno.
