LAOAG CITY – Nagballaag ti Philippine Space Agency (PhilSA) iti publiko iti posible a panagtennag ti rocket debris iti kabaybayan nga asideg iti Puerto Princesa City, Palawan kalpasan ti inyuswat ti China a Long March 12 rocket.
Basar iti ahensia nga iti identified drop zone ket adda iti 25 nautical miles manipud iti Puerto Princesa, Palawan ken 19 nautical miles manipud iti Tubbataha Reefs Natural Park a paset iti Philippine archipelagic waters.
Ti Long March 12 rocket ket inyuswat manipud iti Hainan International Commercial Launch Center iti Wenchang, Hainan iti oras ti 12:10 ti malem idi kalman, Agosto 16.
Kabayatanna, binalakadan ti Philippine Space Agency (PhilSA) ti publiko nga ipakaammo kadagiti otoridad no makakita ti mapapati a debris gapu ta aglaon dagitoy ti toxic substance kas ti rocket fuel.
Nagpanawagan ti ahensia ti coordinated protocols ken inisiatibo tapno maprotehiran ti space assets ken dagiti umili.
