LAOAG CITY – Awan ti nairekord a baro a kaso ti bird flu ti Bureau of Animal Industry (BAI) iti uneg ti maysa a lawas a monitoring ti ahensia.
Daytoy ti umuna a gundaway iti uneg ti agarup maysa a tawen nga awan ti nairekord ditoy pagilian a baro nga aktibo a kaso wenno outbreak ti avian influenza.
Basar iti rekord ti Bureau of Animal Industry, adda pay ti 136 a barangay manipud iti pakabuklan a 53 a siudad ken munisipalidad iti intero a pagilian ti naduktalan a naapektaran ti bird flu.
Naammoan a dagitoy ket manipud iti siam a probinsia ken lima a rehion.
Manipud iti 53 a munisipalidad ken siudad, 51 ti nangipadamag nga awan ti kaso ti bird flu iti uneg ti 90 nga aldaw idinto ti nabatbati ket awan metten ti outbreak manipud iti 31 agingga iti 60 nga aldaw.
