LAOAG CITY – Maikatlo ti Pilipinas kadagiti pagilian iti intero nga Asya a makapaspasar ti saan a gagangay a pudot ti panawen nga adda ti pakainaiganna iti climate change iti napalabas a tallo a bulan wenno manipud iti Disiembre agingga iti Pebrero.
Basar iti report manipud iti Climate Central, naammoan a nakapasar ti pagilian ti temperatura nga adda iti Climate Shift Index (CSI) level 2 wenno nangatngato pay iti uneg ti 74 nga aldaw a mabalin a gapu iti panagbalbaliw ti panawen.
Ti Climate Shift Index ket maysa a sistema a mangrukrukud iti epekto ti climate change iti temperatura iti maysa a pagilian iti kada aldaw. No nangatngato ti lebel, mangipasimudaag daytoy ti nangatngato nga epekto ti climate change.
Kangrunaan nga epekto ti climate change gapu iti tao ket manipud iti burning coal, oil ken methane gas a kaaduan manipud kadagiti rehion iti intero a lubong.
Basar iti report, sumurok 45 a milyon nga indibidual iti intero a kontinente ti nakarikna ti 30 nga aldaw a narisgo a kinabara ti panawen gubuay iti climate change.
Iti Pilipinas, agarup 200 a ribu a Pilipino ti na-expose manipud iti 116 a milyon a pakabuklan a populasion.
Naammoan nga umun-una kadagiti pagilian a makapaspasar ti most unusual heat ket ti Brunei Darussalam iti uneg ti 83 nga aldaw ken maikadua ti Maldives iti uneg ti 81 nga aldaw.
