LAOAG CITY – Inikkan ti Fitch Ratings ti credit outlook ti Pilipinas manipud iti “stable” a nagbalin a “negative” gapu kadagiti risgo manipud iti global energy shock ken pannakaitantan iti public investment a mabalin a makaapektar iti post-pandemic recovery ti pagilian.
Nagtalinaed met ti “BBB” wenno investment grade ti Long-Term Foreign-Currency Issuer Default Rating ti Pilipinas, ngem nagballaag ti ahensia iti kumarkaro a karit kas ti nangato a presio ti enerhia, ngumatngato nga utang ti gobierno ken panagkapsot ti external finances.
Iti baet daytoy, basar iti Fitch nga umabot iti 4.6% ti GDP growth ti Pilipinas ita a 2026 no sadinno a manamnama nga in-inot a panagbangon ti public investment ngem maapektaran ti konsumo ti nangato a presio ti enerhia.
Basar iti Bangko Sentral ng Pilipinas, agtaltalinaed a natibker ti ekonomia gapu iti napigsa a panagdur-as ken naurnos a kasasaad ti banking system.
