LAOAG CITY – Kinumpirmaran ti anak ti pimmusay a ni IN-C4150, agtawen ti 97 ken residente iti Barangay San Marcos iti ili ti San Nicolas nga adda ti sagsagabaen a sakit ti ina na sakbay a nagpositibo iti covid-19.
Segun kenkuana, karaman ditoy ti gigh blood, panagngato ti cholesterol ken ti sugar ti pasyente.
Malaksid iti daytoy, kunana a nagsagaba pay ti ina na ti uyek ken gurigor sakbay a nakumpirmaran a nakaptan ti covid.
Inbatad na nga iti kallabes ket saan unayen a makapangpangan ti ina na gapo iti kinakapsot ti bagi na.
Kunana idi Hulyo 3 ket nagdesisyon da nga itaray iti Laoag City General Hospital ti pasyente gapo ta marigatan nga umanges ken kasapulan na ti serbisyo medikal.
Gapo iti daytoy, dimmalan iti antigen test ti ina na ken positibo ti resulta na rason a naiyakar ti Mariano Marcos Memorial Hospital and Medical Center iti ciudad ti Batac ken dimmalan iti RT-PCR ken nakumpirmaran a positibo iti virus.
Innayon na a nagpaot ti innem nga aldaw a nagpaot ti ina na iti nadakamat nga ospital agingga a pimmusay idi rabii.
Mainaig iti daytoy, kunana nga uppat da a miembro ti pamilya ti dimmalan ti swab test ket ur-urayen da pay laeng ti resulta.
Kabayatanna, nakasangpet metten ti dapo ti ina na kalpasan a nai-cremate ti bangkay na idiay probinsya ti La Union.
