LAOAG CITY – Inaprobaran ni Presidente Ferdinand Marcos Jr. ti Executive Order No. 122 tapno aramiden ken papigsaen ti industria ti critical mineral iti pagilian.
Gagemna daytoy a palawaen ti exploration, development, processing ken panagusar dagiti mineral a napateg iti clean energy, advanced manufacturing, batteries, electronics, digital infrastructure ken national defense.
Iti babaen ti Executive Order, mangisayangkat ti Department of Environment and Natural Resources (DENR) ken Mines and Geosciences Bureau (MGB) ti national exploration program tapno ammoen dagiti baro a deposito ti critical minerals pakairamanan kadagiti dadakkel a reserba ti copper, nickel, cobalt, chromite ken zinc.
Naibilin pay ti alisto a privatization ti government-owned critical mining assets a karaman ti Department of Environment and Natural Resources (DENR), Mines and Geosciences Bureau (MGB) ken Privatization and Management Office ti Department of Finance.
Mainaig iti daytoy, naiget nga ipatungpal ti “use it or lose it” policy no sadinno mabalin nga ikanselar wenno patawan ti pannusa dagiti mining permit a saan a sumursurot iti approved timelines-da, work programs ken development commitments nga awan valid a rason.
Pinababa pay daytoy iti innem a bulan a public consultation iti mining applications tapno mapaalisto ti proseso iti babaen ti maysa a virtual one-stop shop.
Malaksid kadagitoy, palubusan ti Executive Order ti panag-export ti mineral ore nupay maipaayan ti priority acess dagiti lokal a processing plant iti presio a maitutop iti merkado.
Kabayatanna, kinontra dagiti sumagmamano nga environmental ken science advocates ti Executive Order gapu iti danagda a ad-adda a mapaboran daytoy ti foreign investors ken dadakkel a korporasion ngem iti aglawlaw ken dagiti komunidad a maapektaran iti mining.
Naamoan a mapatta-patta a $170 billion ti gatad ti nickel deposits ti pagilian pakairamanan iti kadakkelan iti Southeast Asia. Adda sumurok-kumurang 4.8 million metric tons ti nickel reserves ti pagilian ngem dakkel a paset iti daytoy ket maipapan latta kas raw ore.
