LAOAG CITY – Nagpalagip ni Police Senior Master Sergeant Eric Bumagat, mangidadaulo iti Traffic Division ditoy siudad ti Laoag dagiti amin a tricycle for hire a masapol a surutenda dagiti naituding a panagsingerda ti plete dagiti aglugan nga estudiante ken atleta ti Region One Athletic Association.
Segun kenkuana, immunan a nagtataripnongna kadagiti presidente toda association dagiti tricycle for hire tapnu saanda nga agbalin nga arogante iti umay a nadakamat a programa.
Kinunana nu adda dagiti aglabsing iti pagunnurutan ti panagsingir kadagati agad-adal ket dagos dagitoy a mapilaan ti kaso ken maikkan ti citation ticket.
Namunganay daytoy a ballaag kalpasan nga adda dagiti sumagmamano a reklamo ditoy siudad panggep kadagiti tricycle for hire a sobra nga agsingir kadagiti plete.
Gapu iti daytoy, namnamaen ni Police Senior Master Sergeant Bumagat nga awant ti agbalin a karit nangruna iti maiyuswat a Region One Athletic Association a mangitunda ti umado a pasaheros ditoy siudad.
Malaksid iti daytoy, mangrugi ti Region One Athletic Association Opening Parade ita nga aldaw no sadinno ti assembly area ket iti Rizal street partikular ti sanguanan ti Provincial Capitol.
Mainaig iti daytoy, adda dagiti naituding a traffic route para kadagiti motorista nga inpatungpal ti Philippine National Police – Traffic Division ditoy siudad.
Kabayatanna, adda dagiti kameng ti nasao nga ahensia a nakabantay pakairamanan force multiplier tapnu agtalinaed a natalged ti parada ti Region One Athletic Association ken taray ti trapiko.
