LAOAG CITY – Marigatan ti PNP iti ili ti Banna a mangsolbar ti kaso mainaig iti pannakapapatay ni Michael Arnejo, maysa a lender a taga Barangay Macayepyep iti nasao nga ili.
Daytoy ti inbatad ni Police Major Norman Pentang, ti chief of police iti ili ti Banna.
Segun ken ni Pentang, awan pulos ti maestablisar da a testigo ken motibo tapno adda koma ti pangrugyan da nga agimbestigar.
Innayon na nga immunan a nagimbestigar da no adda ti pannakainaig na iti trabaho ti biktima ken no adda ti sabali a karelasyon na gapu ta adda iti ballasiw taaw ti asawa na.
Nupay kasta, inpetteng ni Pentang a basar iti pamilya ti biktima ket rumuar laeng daytoy no mapan agtrabaho.
Maipalagip a napaltu-paltugan ti biktima kabayatan a nakalugan ti motorsiklo na iti paset ti Sitio Mabarbarit, Barangay Binacag iti met laeng nasao nga ili.
Narekobre iti nakapasamakan ti pammaltog ti dua a kapsula ken maysa a bala ti kalibre 45 a paltog.
