LAOAG CITY – Nangiparuk-at ti naiget a ballaag ni PLtGen. Jose Melencio C. Nartatez Jr., acting Chief ti Philippine National Police (PNP) kadagiti indibidual a tumultulong kadagiti akusado iti anomalya iti flood control.
Gapu iti daytoy, pagsagsaganaen ni Nartatez dagiti police units a mangipatungpal ti arrest warrant ken addan ti pammilinna kadakuada a mangipila ti kaso kriminal kontra kadagiti asinoman a makumpirmaran a tumultulong kadagiti nasao nga akusado.
Inbatadna a maawatanna ti asideg a koneksion dagiti agpapagayam ken agkakapamilia ngem dagiti nadakamat nga akusado ket mapagsungbat iti linteg.
Inlawlawagna nga ipabus-oy a sangoen dagiti akusado dagiti kaso a naipila kadakuada ken saanen a nasken a mairaman pay dagiti nasinged iti biag dagiti naakusaran.
Malaksid iti daytoy, nagpanawagan pay ni Nartatez kadagiti nabatbati a suspek a sumukon ken makikoordinar iti pulisia.
Innayonna nga agtultuloy ti operasion ti nailian a pulisia agingga a mabirukan amin dagiti nasao a karaman iti nasao nga anomalya.
