LAOAG CITY – Saan unay nga apektado ti liderato ti Philippine National Police (PNP) ditoy probinsya iti pannakaikkat ni Vice Presidente Leni Robredo kas co-chair ti Inter-Agency Committee on Anti-Illegal Drug (ICAD).
Reaksyon daytoy ti Ilocos Norte Police Provincial Office (INPPO) babaen kenni Police Major Rely Layug, hepe ti Police Community Relations Office.
Segun kenni Layug, mabalin a ti maysa kadagiti rason ti panangikkat ni Presidente Rodrigo Duterte kenni Robredo iti pwesto ket ti maipagarop a pannakataripnong na kadagiti International Organizations.
Malaksid iti daytoy, posible pay a ti rason ket ti kiddaw ni Robredo iti listaan dagiti High Value Targets nga iggem ti Philippine Drug Enforcement Agency (PDEA).
Inlawlawag ni Layug a saan a dakkel ti epekto ti pannaka-ikkat ni Robredo iti agdama nga iyus-uswat da nga addang seknan iti kampanya kontra iti iligal a droga.
Mainaig iti daytoy, kuna ni Layug a kasapulan ti tulong dagiti international agencies no pakaseknan kadagiti equipments ngem no iti panangmando ket patyen ken makitkita na a kabaelan daytoy ni Presidente Duterte.
