LAOAG CITY – Inbatad ni PLTCol. Ryan Retorar ti Chief of Police ti Philippine National Police (PNP) Laoag nga adda ti panagkurang iti personnel da iti stasion.
Inpakaammona a ti agdama a populasion ket umabot iti 112,676 nga indibidual.
Segun kenkuana, adda iti 124 a PNP Personnel iti agdama no sadinno a iti tunggal pulis ket 900 nga umili ti bantayanda.
Kunana a rumbeng nga adda iti 224 a PNP Personnel tapno iti maysa a pulis ket 500 a tao ti bantayanna.
Kinunana a kasapulan ti 100 a PNP Personnel wenno 45% pay.
Daytoy ti rason a makitkitana no apay maapektaran ti panagresponde aglalo nu aggigiddan ti mapaspasamak nga insidente.
Innayonna a nabayag daytoyen a probleman no sadinno nga inpakaammoda ti ngato a pagopisinaanen ngem adda latta ti panagkurangna.
Kabayatanna, kunana a tapno saan a maapektaran iti panangipaayda ti serbisio ket nagbalin a 2 days ti duty ken 1 a day off iti tunggal personnel.
