LAOAG CITY – Nakasagana ti Philippine National Police (PNP) no maipakustodyar kadakuada ni dati nga Ako Bicol Representative Zaldy Co apaman a makasubli ditoy Pilipinas.
Segun ken ni Philippine National Police Chief PGen. Jose Melencio Nartatez Jr., manarimaan ti pannakikoordinar da kadagiti dadduma a maseknan nga ahensya partikular iti Department of Foreign Affairs (DFA) para kadagiti kasapulan a legal ken diplomatic a proseso mainaig iti pannakaisubli ti dati a kongresista iti Pilipinas.
Mainaig iti daytoy, inpasigurado ti nailian a pulisya nga amin dagiti isaysayangkat da a proseso ket siguradwen da a masursurot dagiti maipatpatungpal a linteg ken due process.
Maipalagip nga inbatad ni Department of the Interior and Local Government (DILG) Secretary Juanito Victor “Jonvic” Remulla nga ideretso iti Philippine National Police ni Co tapno ipadalan ti booking ken documentation procedures kas ti physical examination ken panangala ti mugshots sakbay nga isango iti Sandiganbayan para met iti return of warrant of arrest iti korte.
