LAOAG CITY – Pagsungbaten ti Philippine National Police (PNP) dagiti nagannak a nangipalubos nga agbalin a daton dagiti menor-de-edad nga annakda ken ni Kingdom of Jesus Christ leader Pastor Apollo Quiboloy.
Daytoy ti inpasigurado ni Philippine National Police -Public Information Office Chief PCol. Jean Fajardo, kagiddan ti rakurak dagiti biktima a ti daton wenno ti panangipalubos dagiti nagannak kadakuada ti maipagarup ti agbalin a wagas tapno makapasa iti langit gapu ta maipagarup a daytoy ket panagserbi iti Dios.
Segun ken ni Fajardo, arig panagbugaw ti ar-aramiden dagiti miembro ti Kingdom of Jesus Christ a maikanniwas iti paglintegan.
Rumrummuar a maipagarup nga isagsaganada isuda wenno adda dagiti panagsagsagana sakbay nga iserrekda iti kuarto ti Pastor pakairamanan ti scent wenno bangbanglo nga usarenda ken pannakinaigda iti Pastor.
Kalpasan nga usaren isuda ni Quiboloy ket bagbagaanda dagitoy ti “pure” latta isuda wenno intact ti panagbalinda kas maysa a babai gapu ta ti espiritu ti Dios ti nakinaig kadakuada.
Iti agdama, kunana nga agtultuloy ti panagkalapda ti impormasion ti Philippine National Police maipanggep iti reklamo kontra ken ni Quiboloy kagiddan ti panagadu dagiti complainants wenno dagiti biktima iti panangrames ti Pastor.
Kabayatanna, iti biang met ni Legal Counsel ni Quiboloy, inbatad ni Atty. Mark Tolentino a planted laeng dagiti agibagbaga a biktimada iti Pastor.
Kunana a ti pagaammona ken ni Quiboloy, saanna a maaramid dagiti maibatbato nga alegasion kontra kenkuana.
