LAOAG CITY – Makikokoordinar ti Philippine National Police (PNP) kadagiti nagduduma nga ahensia ti gobierno ken international law enforcement organizations tapno iberipikar ti report ti pannakaarestar ken ni dati nga Ako Bicol party-list Representative Zaldy Co idiay Prague, Czech Republic.
Inbatad ni Philippine National Police Chief Police General Jose Melencio C. Nartatez Jr., maiwaywayat ti panangberipikar iti babaen ti opisial dagiti channel tapno masigurado ti detalye ti nasao nga insidente.
Kunana a nakasagana ti Philippine National Police a mangipaay ti kasapulan a tulong ken suporta kadagiti legal process pakairamanan ti pannakikoordinar para iti posible a panagsubli ni Co iti Pilipinas maiyataday iti rakurak ni Presidente Ferdinand Marcos Jr.
Immunan nga inrakurak ti Presidente a naarestar ni Co kalpasan a maipagarup a simrek iti Czech Republic nga awanan ti umdas a dokumento ken agdama nga adda iti kustodiar dagiti otoridad iti lugar.
Ni Co ket karaman kadagiti maikonkonektar iti maipagarup nga anomalya kadagiti flood control projects iti pagilian.
Kabayatanna, kuna met ti Department of Foreign Affairs (DFA) nga awan pay ti naawatda a kumpirmasion wenno nayon nga impormasion mainaig iti nasao a panangarestar.
