LAOAG CITY – Winaswas ti Sandiganbayan Third Division ita nga aldaw ni dati a Senate President ken ita ket Chief Presidential Legal Counsel a ni Juan Ponce Enrile para iti kaso a plunder.
Daytoy a kaso ket adda ti pakainaiganna iti P172-million plunder case nga inpila kadakuada pakaseknan iti pork barrel scam.
Karaman ti winaswas ti Sandiganbayan ti dati a Chief of Staff ni Enrile a ni Jessica “Gigi” Reyes ken ti nabirngasan kas Pork Barrel Queen a ni Janet Lim Napoles.
Basar iti desision ti anti-graft court, kunana a napaay ti state prosecutors a paneknekan a guilty ni Enrile ken dadduma pay nga akusado.
Dimmanon iti sangapulo a tawen ti kaso kalpasan nga inrakurak ti Office of the Ombudsman nga umdas dagiti ebidensia tapno mapilaan ti kaso da Enrile, Reyes, Napoles ken dadduma pay nga indibidual iti Sandiganbayan.
Naakusaran ni Enrile a biddot ti panagusarna ti Priority Development Assistance Fund daytoy.
Kabayatanna, naragsakan ti kampo ni Enrile ti pannakawaswas ti kasona.
