LAOAG CITY – Posible a sumango iti dengue outbreak ita a tawen ti Pilipinas no agtultuloy a ngumato ti kaso ti agingga iti 78% maidasig iti napalabas a tawen.
Inbatad ni Health Secretary Ted Herbosa a ti kaso ti dengue a nairekord manipud idi Enero 1 agingga iti Marso 15, 2025 ket dumanonen iti 76,425 a nangatngato iti 42,822 a kaso iti kapada a panawen idi 2024.
Ti rehion nga addaan ti kangatoan a kaso ti dengue ket ti Calabarzon nga addaan ti 15,108 a kaso, National Capital Region nga addaan ti 13,761 a kaso ken Central Luzon nga addaan ti 12,424 a kaso.
Nupay kasta, inlawlawag ti Department of Health a ti case fatality rate wenno bilang ti matmatay nga indibidual manipud iti sakit ket nagtalinaed a nababa iti 0.41%.
Idi Pebrero, inrubuat ti Department of Health ti nationwide campaign tapno maliklikan ken makontrol ti panagwaras ti dengue iti pagilian.
Agtultuloy met ti ballaag ti Department of Health iti publiko a dalusan dagiti lugar no sadinno nga agbalbalay dagiti lamok a mangitunda ti dengue.
