LAOAG CITY – Nangiruar ni Presidente Ferdinand R. Marcos Jr. ti Administrative Order (AO) 29, pannakabukel ti Technical Working Group (TWG) para iti pannakaipasdek ti maysa a National Forensics Institute (NFI) tapno papigsaen ti justice system ditoy pagilian ken masursuro iti benneg ti forensics.
Iti babaen ti Administrative Order 29, pinirmaan ni Presidente Marcos idi Enero 22, ti Technical Working Group ket mangiwayat ti komprehensibo a panagadal ken agisubmitir ti rekomendasion nga adda ti pakainaiganna iti pannakaipasdek ti National Forensics Institute, pannakaikonsiderar iti kasapulan nga i-rationalize ken i- streamline dagiti responsibilidad daytoy kadagiti maseknan nga ahensia ti gobierno ken papigsaen ti kapasidad ti pagilian iti forensics.
Agserbi kas Chairman ti Technical Working Group ti Office of the Executive Secretary idinto a ti co-chair met ket ti Department of Justice (DOJ).
Agserbi a miyembro ti Department of the Interior and Local Government, Foreign Affairs, Health ken Budget; Commission on Higher Education; Presidential Human Rights Committee ken University of the Philippines – Manila.
Naammoan ti Department of Justice ket agserbi met kas Secretariat ti Technical Working Group nga isu ti mangipaay ti administrative ken technical support iti body.
