LAOAG CITY – Inbatad ni President Donald Trump a ti kaudian nga strikes babaen ti Estados Unidos a nangpuntirya iti Iran ket panangbigbig da kadagiti tallo a soldado ti Amerika a pimmusay kadagiti naglabas nga aldaw, no sadinno a dua dagiti natay iti Jordan idinto maysa iti Iraq.
Immuna iti daytoy, inrakurak ti US Central Command a nangipatungpal ti Amerika ti baro nga strikes para iti maika-siyam a nagsasaruno nga aldaw a nangngegan iti intero nga Iran.
Segun iti Estados Unidos, pinuntirya da dagiti military sites ken communications networks tapno makissayan dagiti panagraot ti Tehran kadagiti barko iti Strait of Hormuz.
Insungbat met ti Iran a nangipatungpal da ti “surprise attack” iti Syria no sadinno a pinuntirya da ti US aircraft ken Aqaba airport iti Jordan.
