LAOAG CITY – Natay ti presidente ti Discolandia Owners Managers Association iti Barangay 1 ditoy ciudad ti Laoag kalpasan a napaltu-paltugan iti paset ti Barangay Suba iti ili ti Paoay.
Nabigbig ti biktima a ni Mr. Froilander Agdeppa, agtawen ti 52, balo, taga Sinait, Ilocos Sur ngem agdama nga agnanaed iti Barangay 1 ditoy ciudad ti Laoag.
Segun ken ni Police Major Eddie Suyat, ti chief of police iti ili ti Paoay, kabayatan ti panagjag-jogging ti biktima kadwa na ti agnagan Raffy Miguel ket kellaat lattan a pinaltug-paltugan dagiti nakalugan ti XRM motorcycle nga agmaris ti puraw ken nangisit, kasta pay dagiti nakalugan ti Vios nga agmaris ti nangisit.
Kuna na a saan a natamaan ti kadwa ni Agdeppa gapu ta nakatapwak iti derraas.
Inbaga ni Suyat a basar iti inisyal nga imbestigasyon da ket kalibre 45 a paltog ken M15 ti nausar iti napasamak a krimen.
Nagsagaba ti ado a sugat iti nagduduma a paset ti bagina ti biktima a nangitunda ti ipapatay na.
Inpakammo pay ni Suyat nga adda dagiti nakakita iti napasamak a pammaltog ngem saan da a nalasin dagiti suspek gapu ta naka-mask dagitoy.
Kabayatanna, nakarekobre dagiti otoridad iti nakapasamakan ti krimen ti 9 a basyo ti bala ti Caliber 45; 15 a basyo ti bala ti M16 rifle ken maysa a deformed bullet.
Iti agdama, agtultuloy ti naiget nga imbestigasyon ti PNP ken SOCO wenno Scene of the Crime Operative tapno maamoan ti kinatao dagiti suspek ken no ania ti motibo iti krimen.
