LAOAG CITY – Naragsak nga inpakaammo ni Mrs. Elma Gabriel, mangidadaulo ti Provincial Small and Medium Enterprises Office a naminsan manen a naisayangkat ti Producer to Consumer Program ti gobierno probinsial idiay Metro Manila.
Inbatadna a nagpuesto dagiti babassit a negosiante iti paset ti San Juan City Hall ken Quezon City Hall tapno mailako dagiti lokal a produkto dagitoy.
Inlawlawagna a dagiti kangrunaan a magatang ket ti empanada, bagnet, longganisa ken nagduduma a klase ti nateng.
Kunana nga adda pay dagiti sumagmamano a produkto a naaramid iti inabel ken souvenir items.
Innayonna a dakkel a tulong iti pannakibinnuligda kadagiti nadakamat a lokal a gobierno idiay Metro Manila iti panaglako dagiti Micro Small and Medium Enterprises tapno ad-adda pay a mapalawa ti paglakoanda ken ad-adu ti mapastrekanda.
