LAOAG CITY – Kalikagum ti Provincial Health Office a paigetan pay ti active case finding mainaig iti tuberculosis ditoy probinsia.
Segun ken ni Dr. Rickson Balalio, mangidadaulo ti nasao nga opisina, nasaysayaat no ad-adu dagiti maduktalan a kaso ti tuberculosis tapno insigida a malappedan ti panagwaras ti nadakamat a sakit.
Inbatadna a babaen iti daytoy nga addang ket maliklikan pay a maakaran dagiti sumagmamano nga indibidual nangruna kadagiti nakapsot ti resistensiana.
Inlawlawagna nga umad-adu ti bilang dagiti makapaspasar ti tuberculosis ditoy probinsia, saan laeng a dagiti natataengan no diket pakairamanan dagiti ubbing.
Kunana nga ad-adda pay a pinaigetanda iti pannakaipatungpal kadagiti itantandudoda a programa kadagiti nagduduma a lugar tapno saan a makaptan ti makapatay a sakit dagiti umili.
Inpasingkedna nga adda ti ipapaay a libre nga agas ti Provincial Health Office para kadagiti maseknan a pasiente.
Mainaig iti daytoy, awan pay ti inparuk-at a datos ti nasao nga opisina no mano ti bilang dagiti nakaptan ti tuberculosis ditoy probinsia.
Naammoan a ti tuberculosis ket mabalin a maala babaen ti maysa nga indibidual nga aguy-uyek wenno agatsing no sadinno ti mikrobio ket mailaok iti angin a mabalin a maiyakar iti sabali nga indibidual.
