LAOAG CITY – Inlawlawag ni Mr. Aian Ree Raquel, ti Provincial Tourism Officer a ti komento na iti Facebook page na ket inbasar na iti report manipod kadagiti kakadwana iti kapitolyo probinsyal.
Inrakurak na a ti ladawan ket naala ti grupo da iti oras ti alas-5:33 ti bigat ken adda pay ti live ti agnagan ti Eric Cayetano iti oras ti alas-sais iti dayta metlaeng a bigat.
Kunana a kas maysa a kameng ti LGBT wenno lesbian, gay, bisexual, transgender and queer ket maawatan na a kasapulan nga ad-adda nga agtrabaho ngem iti dadduma tapnu makaestablisar ti kredibilidad iti babaen ti panagbalin a mataktika ken napudno.
Innayonna a ti kinapudno ket nalawag nga ado ti basura iti paset ti kapitolyo probinsyal iti oras ti alas-5:33 ti bigat agingga a naglawag.
Kuna na a sakbay a nagturong ti grupo da iti ili ti Pagudpud ket adda paylaeng dagiti ado a basura pakairamanan ti dakkel a fast food delivery box a naabandonar iti stage a nausar kas tech booth.
Inbatad na a napasamak daytoy iti maika-207 nga anibersaryo iti Ilocos Norte isut gapuna a nagbalin daytoy nga emosyonal.
Innayon na a dakkel ti respeto na kadagiti maintenance staff manipod iti ciudad ti Laoag ken iti gobierno probinsyal gapu ta namin-adon a daras a nagkakadwa da iti trabaho, ken napaneknekan na a mapagtalkan dagitoy kangrunaan na iti panagplano ken panagtitinnulong.
Mainaig iti daytoy, inpalgak pay ni Raquel a saan a napaspasamak ti kastoy iti naglabas nga administrasyon iti ciudad wenno iti liderato da dati a City Tourism officer Assistant Sec Ana Remigio ken Ms. Angel Lao, no sadinno nga uray adda dagiti nagkurangan iti kallabes ket saan nga immabot ti kastoy iti kinakaro ti sitwasyon.
Inpaganetget ni Raquel nga amin a karit a sangsangwen ti gobierno, ikonsiderar payen ti human imperfections, ti isyu ket namonganay iti kinakurang ti panagplano ken koordinasyon.
Reaksyon daytoy ni Raquel iti nagbalin a rakurak ti Laoag City Tourism Officer a ni Atty. Charito Malicad nga iresponsable iti nagbalin a komentona seknan iti maipagarup a binabay-an ti lokal a gobierno dagiti nagkaiwarang a basura a nabati iti sangoanan ti Kapitolio Probinsial kalpasan ti naisayangkat a Panagyaman Concert ken Grand Opening Parade kas paset iti panangrambak ti umuna nga aldaw ti Pamulinawen Festival.
