LAOAG CITY – Impakaammo ni Engr. Neil Jose ti Pugad Lawin Ilocos Norte Chapter ti pannakaiyuswat ti maika-lima nga Eco Ride event a maangay iti Brgy. Virvira iti ili ti Carasi.
Kunana a daytoy ket pakipartesiparan dagiti riders manipud iti nagduduma nga ili no sadinno a maangay daytoy inton Setiembre 27 ita a tawen.
Inbatadna a ditoy da nga iwayat ti panagmula ti kayo no sadinno a gagemna ti ad-adda a pannakaprotehir ti aglawlaw kontra kadagiti agdama a karit kas koma iti panagreggaay ti daga ken panaglapped ti air pollution a mangsalbar kadagiti residente ti lugar.
Segun kenkuana, adda ti nakasagana nga imula da a 1,000 agingga 1,500 a seedlings ti kayo ken mabalin pay a manayonan depende kadagiti makipagpaset.
Napili da ti Carasi gapu ta daytoy ti maysa kadagiti lugar a kasapulan ti pananglapped ti panagregaay ti daga ken kasta payen ti agtultuloy a pannakapasayaat ti lugar kas tourist destination.
Kinunana a daytoy ti maika-lima a gundaway a miyuswat ti aktibidad manipud idi 2023 no sadinno ket nangrugi da kadagiti ili ti Solsona, Pasuquin, Burgos, ken Vintar.
Kabayatanna, ginutigotna dagiti riders a makipagpaset iti nasao nga aktibidad gapu ta dakkel ti maitulong daytoy iti pannakaprotehir iti aglawlaw kontra kadagiti agtultuloy a karit kas iti soil erosion, air pollusion, ken ti climate change.
Gapu iti daytoy, ginutigot ni Engr. Jose dagiti riders nga agpa-rehistro iti nasao nga aktibidad tapnon saan laeng a mapdasanda ti agmula ti kayo no diketdi tapno makatulongda pay para kadagiti komunidad ken iti aglawlaw.
