LAOAG CITY – Kinumpirmaran ni Mayor Edward Boyet Quilala iti ili ti Currimao a police personnel iti nasao nga ili ti maysa kadagiti nagpositibo ti coronavirus ditoy probinsya.
Inbatad ni Mayor Quilala a Marso 25 idi naiconfine iti Mariano Marcos Memorial Hospital and Medical Center iti ciudad ti Batac ti maysa a PNP personnel iti ili ti Currimao kalpasan a nakarikan kadagiti sintomas ti covid-19.
Inlawlawag na a naiquarantine met a dagus dagiti 21 a police personnel iti ili ti Currimao iti mismo met laeng a police station ti nasao nga ili.
Innayon a dagus a nag-disinfect ti Bureau of Fire Protection (BFP) iti kwerpo ti pulisya iti ili ti Currimao pakairamanan dagiti lugan ti nasao a PNP personnel.
Mainaig iti daytoy, inpasingked ni Mayor Quilala a kanayun ti panangmonitor da kadagiti naka-quarantine a kameng ti pulisya ken maragsakan gapu ta agpapan ita ket awan pay kadakuada ti nakarikna ti aniaman a sintomas ti covid-19.
Segun pay ti mayor, iti pannakaisayangkat ti contact tracing ket naduktalan nga umabot ti 31 a possible a Persona Under Monitoring (PUMs) a nakapulapol ti pulis a nagpositibo ti covid-19, pakairaman isuna ken ti asawa na isut gapu na nga iti agdama ket naka-self quarantine da.
Gapu iti daytoy, immapela ti mayor kadagiti umili a masapol a sumurot kadagiti pagalagadan kas ti panagtalinaed iti uneg ti balay ken agusar ti face mask tapno maliklikan ti panagwaras ti virus.
Kabayatanna, inpakaammo ti mayor a dagiti kameng ti pulisya a naggapo iti Ilocos Norte Police Provincial Office (INPPO) a napan pay laeng iti ili ti Currimao iti panangidaulo ni Police Major Arnel Tabaog nga agserserbi kas OIC iti PNP-Currimao ket nagtalinaed da pay laeng iti Covered Court.
