LAOAG CITY – Maysa nga unibersidad idiay Vermont, USA ti nangipaay ti honorary degree iti maysa a pusa a masansan a makita iti campus-da.
Inrakurak ti Vermont State University Castleton campus a karaman iti Class of 2024 ti tabby cat a ni Max Dow iti graduating students-da. Ni Max ti kaunaanda nga honorary student a makaawat ti “Doctor of Litter-ature” degree.
Masansan a makitkita ni Max iti campus ti Vermont State University Castleton gapu ta agnanaedda iti amona a ni Ashley Dow iti Seminary Street, ti kalsada nga ayan ti main entrance ti university.
Segun ken ni Ashley, idi bassit pay ni Max ket kellaat daytoy a nagpukaw iti pagtaenganda. Naammoanna a napan daytoy iti campus ken makiay-ayam kadagiti estudiante nga adda iti breaktime-da. Malaksid kadagiti estudiante, makilangen-langen met daytoy iti Dean ken makadandanon mismo iti Dean’s Office tapno idiay nga agay-ayam.
Gapu ta na-cute ti nasao a pusa, nagbalin a “celebrity” ni Max iti Vermont State University ken masansanen a biruken dagiti estudiante. No saan daytoy a makapan iti campus, salsaludsudenda ni Ashley dagiti estudiante no apay a saan a simrek iti pagadalan ni Max ken no okay daytoy.
Iti sumagmamano a tawen nga adda iti unibersidad ni Max, ibilang isunan ti Vermont State University kas maysa a pamilia isu a nagdesision ti Board of Trustees ti unibersidad nga iraman daytoy iti Class of 2024 ken ipaayan daytoy ti honorary degree.
Saan met a mamati ni Ashley iti naawat a pammadayaw iti pusana ken naragsak daytoy gapu ta makaipapaay ti liwliwa ni Max kadagiti estudiante nga stress iti panagadalda.
Naammoan a ni Max ti kaunaan nga honorary student a nakaawat ti “Doctor of Litter-ature” degree.
