LAOAG CITY – Pinaglikudan ni Dr. Loida Valenzuela iti Provincial Veterinary Office ti akusasion nga adda dagiti agsakit ken matay nga aso gapu kadagiti anti-rabies vaccine a naitudok kadagitoy.
Daytoy ti inrakurakna kalpasan nga adda dagiti maipubpulikar online ken dumandanon nga impormasion kadakuada nga iti opisinada iti maitudtudo no apay a pimmusay dagiti tarakenda.
Kunana nga apaman iti panagimbestigarda ket nakumpirmaranda a saanda pay a nagturong iti nasao a lugar dagiti maseknan nga agrekreklamo tapno agbakuna.
Inpakaammo ni Valenzuela a saanda nga agtudok kadagiti aso nga agsagsagaba ti sakit.
Innayonna a no man adda ti saan a napintas nga epekto ti bakuna iti aso ket makita daytoy kalpasan ti 24 nga oras.
Kabayatanna, inbatad ni Valenzuela a no mapasamak ti kastoy ket adda karbengan dagiti makintaraken a mangireklamo kadakuada ngem no ti aso ket agsakit wenno pimmusay kalpasan iti makalawas ket adda ti sabali a pakaigapuananna daytoy.
