LAOAG CITY – Naipilan ti reklamo a theft kontra kadagiti dua a babbai a nagtakaw iti dakkel a mall iti sentro ditoy ciudad ti Laoag.
Nabigbig dagiti suspek nga isuda Sherly Taguiling y Guillermo, agtawen ti 42, addaan ti live-in partner, taga Isabele ngem agdama nga agnanaen iti Brgy 51-A, ditoy ciudad ti Laoag ken ni Liza Valenzuela y Andres, agtawen ti 36, ken residente met laeng iti nadakamat a barangay.
Iti eksklusibo nga interview ti Bombo Radyo Laoag ken ni Eujane Agustin Ramil, ti Internal Security Team Leader iti nasao a pasdek, inbatad na a monmonitoren da dagiti suspek gapu ta iti napalabas a bolan ket namonitor da iti CCTV da nga adda ti inkarga da nga items iti bag da a saanda a binayadan.
Innayon na nga iti pannakakita na manen kadagiti dua iti pagpapaayan na a pasdek ket minonitor na ida iti CCTV Area ket ditoy a nakita na a dua laeng a de lata ti binayadan da nga agbalor ti 71 a pisos idinto a dagiti dadduma nga items nga agbalor ti P318 ket ginandat da nga ipuslit.
Nupay kasta, kuna ni Ramil nga iti panagturong dagiti suspek iti comfort room tapno isu ti pangiplastaran da kadagiti tinakaw da ket ditoyen a napan da tiniliw ket nakita da dagiti saan a nabayadan nga items nga innala da.
Kabayatanna, napalalo ti panagbabawi dagiti suspek ken inpasingked da a nailaw-an da laeng a nagtakaw.
Inpasingked ni Taguiling a daytoy ti damo a nagtakaw da iti kadwa na.
Iti agdama, nagtalinaed dagiti suspek iti kustodyar ti PNP ditoy ciudad ti Laoag ken manamnama nga umabot ti sag-24 ribo a pisos ti mairekomendar a piyansa da para iti temporaryo a pannakawaya-waya da.
