LAOAG CITY – Nagpanawagan ni Batangas 1st District Representative Leandro Leviste iti Office of the President nga imbestigaren dagiti report ti diskriminasyon iti panangipaay ti ayuda.
Iti maysa a press conference iti kamara de representantes, inbutaktak ti agpanpanday linteg nga adda ti maysa a kapitan a pinakaammoan ti presidente ti Liga ng Barangay iti Batangas a saan da a karaman a maipaayan ti ayuda gapu ta maipagarop a madi ti rikna kadakuada ni Governor Vilma Santos-Recto.
Segun iti kongresista, naidanun da ti nasao nga isyu iti Malacañang ken inpasigurado met ti Palasyo nga ikamat da ti P200,000 para kadagiti barangay a saan a nairaman iti pannakaibunong iti ayuda idi kalman, Abril 24, 2026.
Nagpanawagan ni Leviste ken ni Presidente Ferdinand Marcos Jr. nga ipaay ti nasao a kantidad kadagiti saan a naimbitaran a barangay ken imbestigaren ti pannakaibunong ti ayuda iti panangidaulo ni Executive Secretary Ralph Recto.
Immapela met ti agpanpanday linteg a masuspenso ti excise tax ken value-added tax iti langis tapno saanen a mairaman pay ti umili iti saan nga umiso a sistema ti panagibunong ti ayuda.
Mainaig iti daytoy, nagpila pay ni Rep. Leviste ti maysa nga House Resolution a manggutgutigot iti Office of the President nga imbestigaren dagiti report ti diskriminasyon ken possible a korapsyon kadagiti ayuda program kadagiti barangay tapno masigurado ti transparent, patas ken episyente a pannakaibunong dagiti pondo kadagiti lokal a gobierno.
