LAOAG CITY – Inraman dagiti nagpabigbig a 18 a dati a Marines ti Presidential son ken Ilocos Norte Representative Sandro Marcos mainaig iti maipagarup a panangawat kadagiti naka-maleta a kuarta iti naiwayat nga imbestigasion ti Cayetano bloc para iti maanomalya a flood control projects.
Inbatad ni Belnard Tube, maysa kadagiti nagpabigbig a dati a suldado a personal a nakitana mismo ti presidential son iti maysa a pagtaengan ditoy Ilocos idi 2022.
Inpakitana iti panagdengngeg ti maysa a ladawan no sadinno a maipagarup nga agkaduada a dua.
Sinaludsod ni Senadora Imee Marcos ti testigo no adda dagiti intugotda a maleta ken asino ti immawat kadagitoy.
Malaksid ken ni Sandro Marcos, inraman pay dagiti testigo kadagiti alegasionda a nakaawat kadagiti maleta a kuarta ket ni dati a Senador Antonio Trillanes IV.
Segun iti maysa kadakuada, nangipatulod isuna ti maysa a dakkel a paper bag a naglaon ti mapatta-patta a P5 million agingga P6 million ken innem pay a maleta.
Inyistoria pay dagiti nagpabigbig a dati a suldado ti maipagarup a panangipatulodda kadagiti maleta a kuarta kadagiti pagtaengan a maikonkonektar ken ni dati nga House Speaker Martin Romualdez iti McKinley ken South Forbes Park idiay Makati.
Basar iti maysa a testigo, nakaipatulod isuna ti 52 a maleta iti maysa a pagtaengan iti McKinley idinto a 26 met ti naipatulod ti maysa pay a testigo iti South Forbes Park.
