LAOAG CITY – Inpasingked ni House Appropriations Chairperson Rep. Mikaela Suansing a saanen a maamendaran ti nabaliwan a bersyon ti 2026 General Appropriations Bill (GAB) kalpasan a naaprubaran iti maikadwa a pannakaibasa na.
Inpetteng ni Suansing a dagiti panagdengngeg iti Budget Amendments Review Sub-Committee (BARSc) a natratar amin dagiti nabalbaliwan iti gakat ket naisayangkat a silulukat para iti publiko ken naka-livestream pay kadagiti opisyal a Facebook ken YouTube accounts ti Kamara de representantes.
Inaprubaran daytoy ti kamara de representantes idi biyernes iti babaen ti panangidaulo ni Speaker Faustino “Bojie” Dy III iti maikadwa a pannakaibasa ti House Bill No. 4058, wenno ti General Appropriations Bill (GAB) para iti Fiscal Year 2026, iti babaen ti substitution.
Namnamaen nga aprubaran iti maikatlo ken pinal a pannakaibasa ti nailungalong a national budget intono bigat, Lunes, Oktubre 13.
