LAOAG CITY – Nabalakadan dagiti agnanaed kadagiti asideg iti baybay iti ili ti Pagudpud nga agalerto ken agsagana latta para iti posible a panagibakwit.
Segun kenni Mr. Hendrick Pedronan, mangidadaulo ti MDRRMO iti ili ti Pagudpud, masapol nga isagana latta dagiti maseknan dagiti kagamitan da tapno alisto da a maipan kadagiti evacuation center no kasapulan.
Inpasigurado na a nakasagana metten dagiti 14 a designated evacuation center.
Inlalawag na a nabalakadan pay dagiti mangalap a saan a tumapug iti baybay tapno mailiklik iti posible a dakes a pasamak.
Malaksid iti daytoy, adda metten iti natalged a lugar dagiti bilog dagiti mangalap.
Agpapan maisursurat ti damag, kuna ni Pedronan a normal met pay laeng ti level ti danom ngem agtultuloy latta ti panagmonitor da kadagiti nagduduma a barangay.
Kabayatanna, binalakadan pay ni Pedronan dagiti motorista nga agannad iti panagdallayasat da iti Barangay Pancian ken dadduma pay a barangay a masansan a pakapaspasamakan ti panagreggaay ti daga.
