LAOAG CITY – Simmangpeten ni dati a House Speaker ken Leyte Representative Martin Romualdez iti New Quezon City Jail idiay Barangay Payatas idi rabii ti Lunes, Setiembre 14.
Segun iti Bureau of Jail Management and Penology (BJMP) a simmangpet ni Romualdez iti oras ti alas-10:49 ti rabii.
Daytoy ket naggapu iti Philippine General Hospital (PGH) a nakaibaludanna iti maysa a lawas.
Maipadalan ni Romualdez iti standard booking procedure, medical evaluation, fingerprint, mugshot, interview, ken orientation.
Ti nadakamat a pannakaiyakar ni Romualdez iti QC Jail ket maibasar iti pammilin ti Sandiganbayan a maiyakar daytoy kalpasan a naduktalan a “clinically stable” ken saanen a kasapulan a maospital.
Natiliw ni Romualdez idi Setiembre 7 kalpasan a nangipaulog ti Sandiganbayan iti warrant of arrest para iti P7.4 billion a plunder case nga inpila ti Office of the Ombudsman.
Naarestar daytoy iti Cardinal Santos Medical Center sakbay a naiyakar iti University of the Philippines–Philippine General Hospital (UP-PGH) idi Sabado, Setiembre 12 para iti independent examination.
