LAOAG CITY – Inaprobaranen ti Senado iti maikatlo a pannakaibasana iti butos a 13-5-0, ti Senate Bill No. 2387 a mangiyalud-od iti lima a tawen ti termino dagiti opisial ti Barangay ken Sannguning Kabataan (SK).
Iti babaen ti gakat nga inpila ni Senator Francis “Chiz” Escudero, maaddaan ti baro nga electoral cycle ken agresultar iti pannakaiyalud-od ti Barangay ken Sangguniang Kabataan Elections (BSKE) manipud Nobiembre 2026 a maiyakar iti Nobiembre 2028.
Segun ken ni Escudero, gagem ti nasao a gakat ti maaddaan ti sigurado ken naurnos a sistema iti lokal a panagturay tapno maliklikan ti maulit-ulit a pannakaitantan ti eleksion tunggal maigiddan iti nasional nga eleksion.
Nupay kasta, saan met nga umanaong ti sumagmamano a senador kas kada Senador Tito Sotto ken Joel Villanueva, a nangipetteng a ti ad-adda pay a pannakaitantan ti BSKE ket mabalin a manglabsing iti Konstitusion ken masayang ti agarup P8 billion a nailatang ti Comelec kas panagsagana iti eleksion ita a tawen.
Naipasa metten ti third reading iti House of Representatives (House Bill No. 10971) ti isu met laeng a gakat, isut gapu na a masapul a maisubmitir daytoy iti bicameral conference committee sakbay a maisubmitir iti Malacañang para iti pirma ni Presidente Ferdinand Marcos Jr.
