LAOAG CITY – Papaayaban manen ti Sangguniang Panlalawigan ti Nuevo Solar Energy Corporation wenno NSEC iti sumaruno a Regular Session.
Daytoy ket kalpasan a kiniddaw ni Sangguniang Panlalawigan Member ken Chairman ti Committee on Environment Atty. Da Vinci Crisostomo a maimbitaran manen ti pannakabagi ti NSEC pakaseknan pay laeng ti maipasdek a solar energy plant iti paset ti Brgy. Paguludan-Salindeg iti ili ti Currimao.
Inlawlawagna a nasken laeng nga itugot ti kompania dagiti kangrunaan a dokumento ken requirements a kasapulan a maiprisentar inton sumaruno a maiyuswat a Regular Session ti hunta probinsial.
Kunana a babaen iti daytoy ket matingiting a naimbag dagiti agpanpanday linteg ti kalikagum ti kompania mainaig iti proyekto a maiyestablisar ditoy probinsia.
Segun kenkuana, masapol a nasken a dumatag ti pannakabagi ti kompania nangruna ket awan pay ti naawat ti hunta probinsial a CSR wenno Corporate Social Responsibility tapno maikkanda koma ti background pakaseknan iti NSEC.
Kunana a rumbeng pay a mangipasa ti nasao a korporasion ti Resolution of Endorsement iti biang ti Sangguniang Panlalawigan tapno masurot met laeng dagiti umiso a proseso sakbay a mapatgan ti proyekto ti kompania ditoy probinsia.
Maipalagip a naikkan ti Gobierno Probinsial ti Forest Land Use Agreement no. 01-2014 babaen iti Department of Environment and Natural Resources wenno DENR para iti pannakapasayaat ti solar power project iti ili ti Currimao no sadino nga adda kalawana a 35.11 nga ektarya ken umabot iti 3,317 nga agoho a kayo ti posible a mapukan.
No pay kasta, naduktalan ti Sangguniang Panlalawigan a nangrugin a nagpukan ti kompania nga umaboten iti nasurok 900 a kayo ti napukanen iti laksid nga awan pay ti mandar ni Gob. Matthew Marcos Manotoc iti pannakaipalubos a mapukan dagiti kayo gapu ta awan pay ti Memorandum of Agreement wenno MOA a nagpinnirmaan ti Gobierno Probinsial ken ti NSEC.
Mainaig iti daytoy, daytoy metten ti maikadua a daras a pinaayaban ti Sangguniang Panlalawigan ti Nuevo Solar Energy Corporation tapno idependarda ti proyekto a gagemda a maipatungpal ditoy Ilocos Norte ngem saan dagitoy a dimmatag iti naituding nga aldaw.
Kabayatanna, inrakurak ni Atty. Crisostomo nga inaprobaran met laeng ti hunta probinsial ti nasao a gakat kalpasan a nakumpirmaranda nga addan dagiti dokumento ken requirements ti inpasa ti NSEC iti Provincial Administrator’s Office.
