LAOAG CITY – Nagballaag ni Kabataan Party-list Rep. Renee Co a ti napasamak a panagbalbaliw iti panangidaulo ti Senado ket mabalin a maaddaan ti dakkel nga epekto iti naiwayat nga impeachment trial ni Vice President Sara Duterte.
Inbatad ni Co ti tallo a napapateg nga aspeto, daytoy ket posible a pannakaitantan ti proseso, ti mismo a taray ti panangtingiting ken ti pinal a panagbubutos para iti desision.
Inpettengna a nasken a tutukan dagiti Pilipino partikular dagiti agtutubo dagiti sumaruno nga addang ti Senado kalpasan nga inpasa ti Kamara de Representantes ti Articles of Impeachment kontra ken ni Duterte.
Immuli ti kaso iti Senado kalpasan a nagbutos ti Kamara de Representantes ti 257-25-9 tapno mapadisi ti Bise Presidente iti maikadua a gundaway iti uneg ti dua a tawen.
Kuna ni Co, naaramiden ti House Committee on Justice ti responsibilidad daytoy ken inpasiguradona a nasurot ti proseso tapno saan a makwestionaran.
Inlawlawagna a ti panangtingiting iti daytoy ket naggapu mismo iti Makabayan bloc nga adda iti minorya ken saan nga iti liderato ti komite.
