LAOAG CITY – Personal a nagturong iti opisina ti National Bureau of Investigation (NBI) ti kontratista ni Sarah Discaya ita nga aldaw.
Daytoy ket kalpasan ti inrakurak ni Presidente Ferdinand Marcos Jr. a paarestar na daytoy apaman a maiparuk-at ti a warrant manipod iti korte.
Sumangsango ni Discaya ti kaso a malversation ken graft nga inpila ti Office of the Ombudsman mainaig iti maanomalya a flood control project iti Davao Occidental.
Ti proyekto nga agbalor ti P96.5 milyon ket naideklarar a nalpas idi 2022 ngem naduktalan a saan pulos a nairugi kalpasan ti imbestigasyon ti CIDG.
Konektado ni Discaya kadagiti kumpanya a nakaala ti dakkel a paset ti flood control contracts, karaman ti Alpha & Omega General Contractor & Development Corporation.
Karaman pay iti kaso ti sumagmamano nga opisyal ti Department of Public Works and Highways (DPWH) a karaman iti nasao a proyekto.
Ti isasango ni Discaya iti NBI ket makitkita a napateg nga addang iti nalawlawa nga imbestigasyon kontra iti korapsyon kadagiti proyekto a pang-imprastruktura ti gobierno.
