LAOAG CITY – Inrakurak ni Senador Imee Marcos ti suportana iti pannakaitantan ti 2026 Barangay ken Sangguniang Kabataan Elections (BSKE).
Inpettengna a nasaysayaat nga ilatang ti pundo iti ad-adda a pagkasapulan ti pagilian.
Inbatadna a ti mapatta-patta a P16 bilyon a budget para iti eleksion ket mabalin nga usaren iti panangsolbar ti krisis iti langis ken dadduma pay a napapateg a serbisio para kadagiti Pilipino.
Inlawlawagna a napatpateg ti agtultuloy a serbisio iti barangay ngem iti aniaman a panangpulitika nangruna iti baet ti agdama a karit iti ekonomia.
Maipalagip a sumagmamano a daras a naitantan ti Barangay ken Sangguniang Kabataan Elections kadagiti naglabas a tawen.
Immuna iti daytoy, idi 2023, intantan daytoy manipud Disiembre a napagbalin nga Oktubre 2023 ken naminsan nga inkeddeng para iti 2026.
