LAOAG CITY – Kwinestionaran ni Senator “Tito” Sotto III no saan kadi a maipan iti alanganin ti karbengan dagiti Pilipino a mangpili kadagiti lokal a liderda no maulit manen ti pannakaitantan ti Barangay ken Sangguniang Kabataan Elections (BSKE).
Daytoy in inbatad ni Sotto iti interpellation-na iti rakurak nga addang ni Senator Francis “Chiz” Escudero a mangpaatiddog ti termino dagiti barangay ken SK officials iti lima a tawen manipud iti agdama nga uppat a tawen, ken ti pannakaiyakar ti BSKE inton Nobiembre 2028.
Segun ken ni Sotto, naitandudo idi tawen 2023 dagiti agdama a barangay officials ngem naitantan ti 2025 elections agingga iti Nobiembre 2026. No maisayangkat ti eleksion inton 2028, kunana a mabalin nga agpaut iti tallo a tawen ti holdover period dagiti agdama nga opisial.
Malaksid iti daytoy, dinakamat pay ni Sotto ti kinapateg ti accountability dagiti barangay officials gapu kadagiti kaso a sangsangoen dagiti sumagmamano nga opisial ti barangay.
Inpettengna dagiti reklamo a naipila kadagiti sumagmamano nga opisial, pakairamanan dagiti 12 a barangay officials iti Iloilo mainaig iti panangkissayda ti ayuda dagiti AICS beneficiaries.
Gapu iti daytoy, inpetteng ni Sotto a napateg a maited kadagiti Pilipino ti gundaway a mangpili kadagiti lokal a liderda babaen ti regular a pannakaisayangkat ti eleksion.
