LAOAG CITY – Ipabasura ti Senado iti Korte Suprema ti petision nga inpila ni Kingdom of Jesus Christ Pastor Apollo Quiboloy iti naiyisyu nga arrest order kontra kenkuana iti Senate Committees on Public Order ken Dangerous Drugs and Women and Children.
Iti komento nga inpila ti Office of the Solicitor General (OSG) para iti Senado, kiniddaw ni Solicitor General Menardo Guevarra iti Korte Suprema nga ibasura ti aplikasion ni Quiboloy para iti temporary restraining order (TRO) ken writ of preliminary injunction.
Inbatad ni Guevarra, ni Quiboloy ket saan nga entitled nga agkiddaw ti ‘relief’ gapu ta nalawag nga awan met ti kalikagumna nga isuko ti bagina para iti proseso ti Korte ken ti Senado.
Kunana a ti maisaysayankat nga imbestigasion iti Senado ket ‘in aid of legislation’ ken ti inbokasion ti Pastor ti constitutional right against self-incrimination-na ket awan iti lugar.
Maipalagip a ni Quiboloy ket naiyisyuan babaen kadagiti komite ti Senado ti warrant of arrest kalpasan a napaay a nagatendar ken saanna nga ingkankano ti subpoena iti iwaywayatda nga imbestigasion kontra kadagiti maipagarup a panagabuso daytoy.
Malaksid iti Senado, ni Quiboloy ket naiyisyuan met ti warrant of arrest ti Korte a mangig-iggem kadagiti sangsangoenna a kaso a qualified human trafficking ken child and sexual abuse.
Kabayatanna, naiget met a kinontra ni Quiboloy dagiti nasao nga akusasion.
